மாணவி தற்கொலை - யார் குற்றம்?

Posted by SanjaiGandhi™

வடகரைவேலன் அண்ணாச்சி, சமீபத்தில் தற்கொலை செய்துக் கொண்ட கோவை மாணவி பற்றிய செய்தியை கதம்பத்தில் எழுதி இருக்கிறார். அது ஆழமான விவாதத்திற்கு உரிய செய்தி. அந்த மாணவியின் மரணத்திற்கு பெற்றோரும் காரணம் என்பது போல் சிலர் சொல்லி இருந்தார்கள். என் பார்வையில் ஆசிரியை மற்றும் பள்ளி நிர்வாகமே குற்றவாளிகள். பள்ளியில் பாடத்துடன் சேர்த்து ஒழுக்கமும் கற்றுக் கொடுப்பது ஆசியர்களின் கடமை தான். ஆனால் ஒழுக்கத்தை மிரட்டலின் மூலம் கற்றுக் கொடுக்கக் கூடாது. இப்போது இருக்கும் மட்டமான கல்வி முறையை பின்பற்றிக் கொண்டு விட்டு, அந்த மாணவி காப்பி அடித்ததை எந்த வித்தத்திலும் நியாயப் படுத்தவில்லை.

ஆனால், அவர் மீது நடவடிக்கை எடுப்பதற்கு முன் சிலவற்றை யோசித்திருக்க வேண்டும். முதலில் அந்த மாணவியின் மனநிலை அறிந்திருக்க வேண்டும். எது போன்ற தண்டனைகளை அவளால் தாங்கிக் கொள்ள முடியும் அல்லது எந்த முறையில் அவளைத் திருந்த வேண்டும் என்பதை யோசித்திருக்க வேண்டும். வேட்டையாடு விளையாடு படத்தில் கமல் “ ஒருத்தனைப் பார்த்ததும் அவன் கிரிமினலா இல்லையான்னு கண்டு பிடிக்க முடியாதவன் என்னைய்யா போலிஸ்காரன்?” என்பார். அதே போல், மாதக் கணக்கில் நெருங்கிப் பழகியும் ஒரு மாணவியின் மனநிலைப் புரியாதவர் என்ன ஆசிரியர்?.

அந்த மாணவி ரொம்ப சென்சிடிவாக இருக்கும் பட்சத்தில், அப்போதைக்கு சாதாரனமாக அவரை கண்டித்து விட்டு , தொலைபேசி வாயிலாகவோ கடிதம் மூலமோ அந்த மாணவியின் தவறை அவள் பெற்றோருக்குத் தெரிய படுத்தி , மிகக் கடுமையாக நடந்துக் கொண்டால் ஏற்பட சாத்தியமாகும் விளைவுகளைப் புரியவைத்து , மென்மையாக அவளுக்குப் புரியவைக்க சொல்லி திருத்தி இருக்க வேண்டும். அதை விட்டு, எடுத்த எடுப்பிலேயே உன் பெற்றோரை அழைத்து வா என்பது மிருகத் தனம். அந்த மாணவி , தான் செய்த தவறை தன் பெற்றோரிடமே சொல்லி அதற்காக பள்ளிக்கு அழைக்கிறார்கள் என்பதை எப்படி தைரியமாக சொல்வாள்?. பெரும்பாலான பெற்றோர்களுக்கு, தன் பிள்ளைகளின் சிறு பிழைகளைக் கூட பொறுமையாக யோசித்து அறிவுரை சொல்லும் மனப் பக்குவம் கிடையாது. உடனே அடிப்பார்கள். அல்லது வேறு யாருடனாவது ஒப்பிட்டு மனதில் நீங்காத காயத்தை எற்படுத்துவார்கள். இது போன்ற சூழலில் அந்த மாணவியிடம் அவர் பெற்றோரை அழைத்து வர சொன்னது பெரும் குற்றம்.

பொறுப்பாக இருக்க வேண்டிய ஆசிரியையே யோசிக்காமல் உடனடியாக நடவடிக்கை எடுக்கும் போது, அந்த சிறுமியின் அவசர புத்தியை எப்படி குறை சொல்வது?. போதிக்கும் நிலையிலிருபப்வர்களே யோசிக்காமல் கடுமையாக நடந்துக் கொண்டு தண்டனைக் கொடுக்கும் போது, அவ்வளவாக படிப்பறிவில்லாதவர்கள் அல்லது தங்களால் முடியாததை தங்கள் பிள்ளைகள் மூலம் அடையத் துடிக்கும் பெற்றோர்கள் பொறுமையாக நடந்துக் கொள்வார்கள் என்று எப்படி எதிர்பார்க்க முடியும்?. எப்படிப் பார்த்தாலும் ஆசிரியை செய்ததே பெரிய தவறாக தெரிகிறது.

மேலும் பாடப் புத்தகங்களை மனப்பாடம் செய்ய வைப்பதில் காட்டும் அக்கறையில் 1 சதவீதம் கூட மாணவர்களுக்கு மனவலிமை கிடைக்க செய்யும் எந்த பயிற்சியையும்பெரும்பாலான பள்ளிகள் அளிப்பதில்லை. முதலில் இந்த பாழாய்ப் போன தேர்வு முறைகளையும் மதிப்பெண் முறைகளையும் ஒழிக்க வேண்டும்.

அந்த மாணவி தன் உள்ளங்கையில் எழுதி வைத்திருந்த வாசகம் :

“sorry, everybody... give everyone a chance 2 change”

இனியும் இது போன்ற மரணங்கள் நிகழாமல் தவிர்க்க வேண்டும்.