குடி மக்களாட்சி

Posted by SanjaiGandhi™

சமீபத்தில் ஒகேனக்கல் செல்லும் வழியில் ஒரு அரசாங்க சாராயக் கடை முன்பு கண்ட காட்சி அதிர்ச்சியாக இருந்தது. ரயில்நிலைய பயணிகள் வரிசை மாதிரி அவ்வளவு பெரிய குடிமக்கள் வரிசை. அடுத்த நாள் ஊரில் இருக்கும் அரசாங்க சாராயக் கடை திறக்கும் முன் வாசலை அடைத்துக் கொண்டு மிகப்பெரிய கூட்டம். அது குடியிருப்புப் பகுதி. ஒதுக்குப் புறங்களில் வைத்துத் தொலையலாமே. ரேஷன் கடையில் பொருட்கள் வாங்க இப்படி வரிசையில் காத்திருப்பார்களா இவர்கள்?.அது பெண்கள், பிள்ளைகள் வேலை. காலையில் காய் கறி வாங்க கடைக்கு அனுப்பினால் போக மாட்டார்கள். ஆனால் சாராயக் கடைக்கு வந்து காத்திருக்கிறார்கள்.

எல்லாப் புகழும் கழகங்களுக்கே. கழக அரசாங்கம் வெளியிட்ட வருடத்தின் முதல் சாதனை அறிக்கையே சாராயம் விற்று சம்பாதிச்சதைப் பற்றி தான். குடிப்பழக்கத்தால் விபத்துகளின் எண்ணிக்கையும் உயிர் பலியும் அதிகமாகிக் கொண்டே வருகிறது. குற்றங்களின் எண்ணிக்கையும் அதிர்ச்சி அளிக்கும் வகையில் அதிகரித்திருக்கிறது. குடிபோதையில் வாய்த்தகராறுகள் கொலையிம் முடிந்தவை ஏராளம். தெருவுக்குத் தெரு சாராயக் கடைகளைத் திறந்து சேவை செய்கிறது அரசாங்கம்.

அவ்வப்போது விலைகளையும் உயர்த்திக் கொண்டே இருக்கிறார்கள். அரிசி பருப்பு, வெளியிலிருந்து வாங்கி விற்கும் பெட்ரோல், எரிவாயு போன்றவை விலை உயர்ந்தால் கதகளியே ஆடுகிறோம். சாராய விலையை உயர்த்திக் கொண்டே இருப்பதற்கு யாராவது எதிர்ப்புத் தெரிவித்திருக்கிறார்களா? என்ன விலை குடுத்தும் குடிப்போம் என நினைக்கிறார்கள். அந்த அளவுக்கு அரசாங்கமே மக்களை சாராயத்திற்கு அடிமை ஆக்கி வைத்திருக்கிறது. மக்களிடம் சாராயம் விற்று பிடுங்கும் காசிலிருந்து பொருகள் வாங்கி அவர்களுக்கே இலவசமாய்த் தருகிறார்கள். ஏமாளிகள் இதற்குத்தான் வாக்களிக்கிறார்கள்.

எவ்வளவு விலை உயர்த்தினாலும் எதிர்ப்பில்லாமல் வாங்கிக் குடிக்கும் சாராய அடிமைகளைக் கேட்டால், உழைப்பதால் வரும் உடல் உழைப்பையும் மன உளைச்சலையும் போக்கத் தான் குடிப்பதாக சொல்கிறார்கள். குடிக்காதவர்களுக்கெல்லாம் மன உளைச்சலே இல்லை பாருங்க. பொங்கல் அன்று விஜய் டிவியில் ஒரு நிகழ்ச்சியில் பேசிய மாணவர், காலையில் 2 மணி நேரம் மூட்டைத் தூக்கிவிட்டு சம்பாதித்து தினம் கல்லூரிக்கு சென்றதாக சொன்னார். அவருக்கு உடல் வலிக்காதா? தினம் குடித்துவிட்டா படிக்க சென்றார்?.

அடுத்த தேர்தலில் சாராயத்திற்கும் மானியம் அளித்து ரேஷன் கடைகளில் வழங்கப் படும் என எந்தக் கழகமாவது அறிவித்தால் குடிமக்களின் மொத்த வாக்குகளையும் அள்ளிவிடலாம். அது குடி மக்களுக்கான குடியாட்சி என பெருமையாக பீற்றிக் கொள்ளலாம். இந்தப் பொழப்புக்கு...


சாராயம் விற்றவர்கள் கல்வித் தந்தைகளாகி அரசியல் அதிகாரத்திற்கு வந்தால் அவர்கள் மூளையில் வேறு என்ன திட்டம் வர முடியும்?.நாம் இனியும் அரசியலை பழித்து ஒதுங்கியே இருப்போம். இந்த நாடும் நாட்டு மக்களும்.....