Mini Meals v 4.02.10

Posted by SanjaiGandhi™

இந்த வார ஆரம்பத்தின் ஒரு முன்மாலைப் பொழுதில் கோவை மாநகராட்சியில் 20 சொச்சம் கருத்தரங்கு அறைகளில் எதோ ஒன்றில் சில பெரும்புள்ளிகளுடன் சிறு புள்ளியாய் நானும் எதிரில் சில அதிகாரிகளுமாய், ஆணையர் திரு. அன்சுல் மிஷ்ராவுக்காக காத்திருந்த இடைவேளையில் உரையாடிக் கொண்டிருந்தோம். அப்போது என் அருகில் இருந்த ஒருவர் தன் அலுவலகம் இருக்கும் பகுதியின் பெயரை சொன்னதும் எதிரில் இருந்த அலுவலர் ஒருவர் இடைமறித்தார்.

”லக்‌ஷ்மிபுரத்துல எந்த இடம்ங்க?”
“அந்த பாலத்துக்கு பக்கம் லெஃப்ட்ல ஒரு ரோடு போகுமே அங்க சார்”
“ஒரு மளிகைடை இருக்குமே. அங்கயா?”
“இன்னும் கொஞ்சம் மேல வாங்க” ( கையை உயர்த்திக்காட்டினார்)
“ஆமா.. கொஞ்ச தூரத்துல ஒரு டீக் கடை இருக்கும். என் வீடும் அங்க தான் இருக்கு”
“ஓ. நாங்க ஒரு TWAD போர்ட் இஞ்சினியர் வீட்ல கீழ வாடகைக்கு எடுத்திருக்கோம் சார்”
“அப்டியா?. வீட்டு நம்பர் என்ன?
“15B”
“15Bயா? 16Bயா?
"சாரி சார்.. 16B தான்.. அந்த வீடு தெரியுங்களா?”
“அந்த வீடே என்னோடது தானுங்க..TWAD போர்ட் இஞ்சினியர் இல்லை.. கார்பரேஷன் இஞ்சினியர். மாடியில் தான் குடி இருக்கிறேன். ஆனா உங்கள பார்த்ததில்லை பாருங்க”
என் அருகில் இருந்தவர்கள் சிரித்து முடிக்க நீண்ட நேரம் ஆகியது.அந்த நபருக்கு ஆச்சர்யம்.. இது வரை இருவரும் சந்தித்துக் கொண்டதே இல்லையாம். வீட்டம்மாவிடம் தான் வாடகை தருகிறாராம். அதனால் வீட்டய்யாவை பார்த்ததில்லையாம்.. இது எப்டி இருக்கு.. :)

கோவை மாநகராட்சி ஆணையர் அன்சுல் மிஷ்ரா மிகவும் எளிமையாகவும் நட்பாகவும் பழகுகிறார். நேர்மையானவரும் கூட. மிக அழகான தமிழில் பேசுகிறார். தமிழ் அதிகாரிகளைப் போல் ஆங்கிலத்தில் பேசி டரியல் ஆக்குவதில்லை. அதே போல் கோவை மாநகர காவல்துறை ஆணையர் திரு.சிவணாண்டி மிக சிறப்பாக செயல்படுகிறார். குயர் கணக்கில் பேப்பரும் பான்பராக்கும் மசால்வடையும் வாங்கித் தர வேண்டிய அவசியம் இல்லாமல், முதன் முறையாக, தொலைபேசியில் புகார் அளித்தாலே போதும் FIRவீடு தேடி வரும் திட்டத்தை தொடங்கி வெற்றிகரமாக செயல்படுத்திக் காட்டினார். ஹெல்மெட் அணிவதை தீவிரப் படுத்தினார். பணியில் இருக்கும் போது காவலர்கள் அலை பேசியை உபயோகித்தால் கடும் நடவடிக்கை எடுக்கப்படும் என உத்தரவிட்டிருக்கிறார். ஏற்கனவே , யாராவது பேருந்துகளில் படியில் பயணம் செய்தால் ஓட்டுனர் மற்றும் நடத்துனர் மீது நடவடிக்கை எடுக்கப் படும் என உத்தரவு பிறப்பித்திருக்கிறார். நேற்று மாநகர பேருந்தில் பயணம் செய்த போது படியில் நிற்க நடத்துனர், யாரையும் அனுமதிக்கவில்லை. நல்ல கமிஷனர் தான்.

 இப்போதெல்லாம் கோவையில் அநேக இடங்களில் பெரும் ஃப்ளக்ஸ் பேனர்களில் அஞ்சா நெஞ்சன் அழகிரி ஓயாமல் சிரித்துக் கொண்டிருக்கிறார். நேற்று பொள்ளாச்சியிலும் அவரின் பிரமாண்ட சிரிப்பை தரிசிக்க நேர்ந்தது. அழகிரியார் தெற்கில் மட்டுமில்லாமல் தமிழகம் முழுதும் பரவிக்கொண்டிருக்கிறார். சுடாலினார்(நன்றி TBCD) உஷாராக இருக்க வேண்டும். உருண்டு திரண்டு வரும் கரும் மேகம் சூரியனையே மறைக்கும். நிலா எம்மாத்திரம்?. அரசியல்வாதிகளுக்கு இணையாக ஆன்மிக வியாபாரிகளும் களத்தில் குதித்துவிட்டார்கள். எங்கெங்கு நோக்கினும் ஜக்கியும் நித்தியும் பிரமாண்டமாக புன்னகைக்கிறார்கள். சில பால்கள் சித்து வேலைகள் காட்ட மைதாணம் நோக்கி பெரு வாரியாக அழைக்கிறார்கள். அரசியல்வாதிகளைப் போல் ஆன்மிக வியாபாரிகளுக்கும் தொண்டரடிபொடிகள் அதிகரித்து விட்டார்கள். போட்டி போட்டுக் கொண்டு பேனர் கட்டுகிறார்கள் கடவுளின் ஏஜெண்டுகளின் கடைக்கண் பார்வைக்கு.. நல்லா இருங்க ராசாக்களா..

தென் ஆப்பிரிக்காவின் மிகப் பெரும் இண்டர்நெட் நிறுவனம் telkom. இதன் மோசமான சேவையில் கடுப்பான ஒரு IT நிறுவன பணியாளர் புறாவின் மூலம் தகவல் அனுப்ப முடிவு செய்திருக்கிறார். அதன் படி 4GB மெமரி ஸ்டிக்கை ஒரு புறாவின் காலில் கட்டி 85கிமி தொலைவில் உள்ள ஒரு நிறுவனத்திற்கு அனுப்பி இருக்கிறார். அந்தப் புறாவும் சமர்த்தாக அந்த நிறுவனத்திற்கு சென்று மெமரிஸ்டிக்கை ஒப்படைத்துவிட்டது. அதில் இருந்த டேட்டாவை அந்த நிறுவனத்தினர் தங்கள் கணினியில் ஏற்றிவிட்டார்கள். இதற்காக ஆன காலம் 2 மணி நேரம் மட்டுமே. இந்த 2 மணி நேரத்தில் telkomன் அதிவேக இணைப்பின் மூலம் இதே தகவல் 4% மட்டுமே அப்லோட் ஆகி இருந்ததாம். இது எப்டி இருக்கு? :))

சில வணிக விசாரணைகளுக்காக Tradeindia இணையதளத்தில் மேய்ந்துக் கொண்டிருக்கும் போது ஒரு நிறுவனமும் அதன் அலுவலக விலாசமும் கண்ணில்பட்டது.இது காய்கறிகள் ஏற்றுமதி நிறுவனம். MLA ஹாஸ்டல்ல தங்கறவங்க தான் பெரும் வணிகர்கள் என்று பார்த்தால், ஹாஸ்டலே கமர்சியல் காம்ப்ளக்ஸ் போல் தான் செயல்படுகிறது போலும்.

ANBU INTERNATIONAL
No. C/6A, MLA Quarters,
Government Estate,
Chennai - 600002, Tamil Nadu, India

Key Personnel
Mr. J. Karunanithi (Proprietor)

இதெப்டி இருக்கு?


எதிர் வரும் ஞாயிறுக் கிழமை, சென்னையில் பிரமாண்டமான கேபிள்சங்கர் எழுதிய புத்தகமும் திருப்பூர் திலகம் பரிசல்காரன் எழுதிய புத்தகமும் வெளியிடப்படுகிறது.பரிசல் மாமனின் அன்பான அழைப்பை ஏற்று சென்னை வந்து விழாவை சிறப்பிக்க உள்ளேன். அரசியல்வாதிகள், ஆன்மீக வியாபாரிகளுக்கு இணையாக எனக்கு கட் அவுட்கள் பேனர்கள் வைப்பதைத் தவிர்க்கவும். குறிப்பாக “வருங்காலப் பிரதமரே வருக வருக” என போஸ்டர் அடித்து ஒட்டுவதைத் தவிர்க்கவும். எனக்கு புகழ்ச்சி பிடிக்காது. இது வரை ரசிகர் மன்றம் அமைக்க வந்த 154685478521458 சொச்சம் விண்ணப்பங்களை நிராகரித்துள்ளேன். மேலும் நான் சென்னை வரவில்லை என்றால் தீக்குளித்துவிடுவதாக அச்சுறுத்தி மெயில் அனுப்பிய 143 இளம்பெண் வாசகிகளுக்கும் என் அன்புகள். வெறும் பெயரையும் ஊரையும் மட்டும் போட்டு அந்த மின்னஞ்சல்களை எல்லாம் வெளியிடுவதில் விருப்பம் இல்லை. அவர்களின் மெயில் முகவரிகளுடன் விரைவில் வெளியிடுகிறேன். ஏனெனில் இப்போதைக்கு 143 மெயில் ஐடிகள் உருவாக்க நேரம் இல்லை என்பதை என் ஏழரை நாட்டு வாசகர்கள் புரிந்துக் கொள்வீர்கள் என நம்புகிறேன்.