Mini Meals v 5.02

Posted by SanjaiGandhi™

அதிஷாவாக அவதாரம் எடுத்து உங்களுக்கெல்லாம் அறிமுகம் ஆகும் முன்பு வினோத்குமாராகவே இவர் எனக்கு நண்பன். அதிஷா என்ற பெயரில் யாரோ எழுதுகிறார்கள் என்று நினைத்திருந்தேன். ஒரு நாள் வால்பையன், அதிஷாவுடன் சாட்டில் பேசியதை அவர் வலைப்பூவில் வெளியிட்டார். அதில் அதிஷாவின் மின்னஞ்சல் முகவரி பார்த்து தான், அட இது நம்ம வினோத்தாச்சே என தெரிந்துக் கொண்டேன். கடந்த ஞாயிறன்று இருவரும் சென்னையிலில் இருந்து ஒன்றாய் பயணித்து கோவை வந்தோம். அப்போது அவர் பையில் அடுக்கி வைத்திருந்த புத்தகங்களைப் பார்த்தேன். பெயர்களைப் படிக்கும் போதே கண்ணைக் கட்டியது. பயபுள்ள ஏன் ஒரு மார்க்கமா இருக்குன்னு அப்போ தான் தெரிஞ்சது. சரி விஷயம் அதில்லை. நம் நண்பன் அதிஷா @ வினோத்குமாருக்கு நாளை மறுநாள் ( 18.02.2010 ) வியாழக்கிழமை அன்று கோவையில் திருமணம் நடைபெறுகிறது. வாழ்வில் எல்லா வளமும் நலமும் பெற்று வாழ நண்பனை வாழ்த்துகிறேன்.

கோவையில் உலகத் தமிழ் செம்மொழி மாநாடு நடைபெறப் போவதை அனைவரும் அறிவீர்கள். தினம் தினம் செய்தி அறிக்கைகள் பார்த்தால் தான் எங்களுக்கும் நினைவுவரும். கோவையில் அதற்கான எந்த அறிகுறியும் இல்லை. யாரோ ஒரு புண்ணியவான் தகவல் அறியும் உரிமை சட்டப் படி , செம்மொழி மாநாட்டிற்கு ஒதுக்கீடு செய்திருக்கும் நிதி விவரம் கேட்டிருக்கிறார். உதட்டைப் பிதுக்கியபடி பதில் வந்திருக்கிறது. அவர் கோவையில் எங்களைக் கேட்டிருக்கலாம். பிம்பிலிக்கி பிலாப்பி.. மாமா பிஸ்கோத்துன்னு நாங்களே சொல்லி இருப்போம். இன்னும் மின்சார வசதி சீரடையவில்லை. தினம் இரண்டு  மணி நேரக் கட்டாய மின் தடை இல்லாமல் அவ்வப்போது சில பல மணிநேரங்கள் மின்தடை தவிர்க்க முடியாததாக இருக்கிறது. சிறு கோளாறுகளைக் கூட உடனடியாக சரி செய்வதில்லை. செம்மொழி மாநாட்டின் போது இன்னும் என்ன எல்லாம் அரங்கெறப் போகுதோ..

பரிசல்காரன் மற்றும் கேபிள் சங்கரின் புத்தக வெளியீட்டு விழா இனிதே நடைபெற்றது. நண்பர்களுடன் சென்று வந்தது இனிமையான அனுபவம். கார்க்கி எங்கள் உடன் இருந்து மிக நன்றாய் கவனித்துக் கொண்டார்.என் மாமன் அப்துல்லா தன் வீட்டில் தங்கவைத்து மிகச் சிறப்பாய் உபசரித்தார். நிகழ்ச்சியின் போது ஏராளமான நண்பர்களை சந்திக்க நேர்ந்தது. வழக்கம் போலவே முதல் முறை சந்திப்பது போலன்றி மிக இயல்பாய் சென்னைக்காரர்கள் பழகினார்கள். இரண்டு எழுத்தாளர்களிடமும் புத்தகமும் ஆட்டோகிராபும் வாங்கிக்கொண்டேன். நண்பர் சுரேகா அற்புதமாக நிகழ்ச்சியைத் தொகுத்து வழங்கினார். என் பின்னூட்டங்களைப் பார்த்து டரியலாகி என் ப்ளாகை படிக்கவே பயமாக இருப்பதாக இரண்டு அப்பாவிகள் சொன்னதைக் கேட்டு, கவுஜாயினி காயத்ரி கவிதை படிக்காமலே எனக்கு அழுகாச்சி அழுகாச்சியா வந்துச்சி.. குசும்பா கவனிக்க. நானும் ரவுடிதாம்லே.. கும்மி எல்லாம் கொறைச்சிக்கனும்.. :). அன் மூஞ்சியைப் பார்ந்த சில வினாடிகளிலேயே, இனி தினம் வந்து உங்களுக்கு 10 கமெண்ட் போட்டு கும்முறது தான் எங்கள் வேலை என்றும் அதே வாய்கள் சொல்லின. எப்டித்தான் கண்டுபிடிக்கிறாங்களோ..


வழக்கமாக, வெங்கட்ப்ரபு அண்ட் கோவின் படம் திரைக்கு வரும் போது இவர்களின் பந்தாவிற்கு அளவே இருக்காது. எல்லா சேனல்களிலும் கும்பல் கும்பலாக வந்து தங்களின் உலகத் தரம் வாய்ந்த திரைப்படத்தின் மேக்கிங் ஆஃப் ஜிம்பலக்கா ஜும்பாலே என்று மொக்கைப் போட்டுத் தள்ளிவிடுவார்கள். உலக சாதனைகள் படைக்கும் ஜேம்ஸ் காமரூன் அணிகள் கூட இவ்வளவு பேச மாட்டார்கள். ஆனால் இவர்கள் அலப்பறை தாங்காது. அதில் இந்த ப்ரேம்ஜியின் டார்ச்சர்.. அப்பப்பா சொல்லி மாளாது.. எல்லாப் படத்திலும் ஒரே மாதிரி வசனங்கள் தான். அதுவாச்சும் புதுசா என்றால் இல்லை.. என்னக் கொடுமை சார் இது என்று இன்னும் எத்தனைப் படங்களில் சாவடிப்பாரோ?. எனினும் கோவாப் படத்திற்கு பெரிய சீன் எதுவும் போடவில்லை. அடக்கியே வாசித்தார்கள். படம் அந்த அளவிற்கு ஊத்திக் கொண்டது. கோவா என்றால் ஊற்றிக் கொள்ள வேண்டுமே. ரொம்ப அடக்கி வாசிக்கிறார்களே திருந்திவிட்டார்கள் போலும் என நினைத்துக் கொண்டிருக்கும் போதே கோவை U டிவியில் ப்ரேம்ஜி அண்ட் கோ கும்பலாய் வந்து பிப்ரவர் 14ஆம் தேதி எங்களை சந்திக்கப் போவதாக பயமுறுத்தினார்கள். அடப்பாவிகளா.. இங்கயும் வந்துட்டிங்களா.. நல்ல வேளை நான் அன்று சென்னையில் இருந்ததால் உயிர் பிழைத்தேன்.


புகழ்பெற்ற தொலைக்காட்சி நகைச்சுவை நடிகர் & எழுத்தாளர் அலெக்ஸ் கிர்க், ஒரு வார்த்தைக் கூட பேசாமல் ஒரு வாரம் மௌணமாக வாழ்ந்திருக்கிறார். உலகிலேயே மிகவும் அதிகம் பேசுபவர் தான் தான் என சொல்லிக் கொள்ளும் கிர்க், ஒருவாரம் பேசாமல் இருக்க முடிவு செய்து அதை சாதித்திருக்கிறார். தன் காதலியுடன் பேசாமல், தொலைபேசி அழைப்புகளுக்கு பதில் சொல்லாமல் சைகையிலும் காகிதத்தில் எழுதிக் காட்டியுமே சமாளித்திருக்கிறார். இரவு உணவுக்கு காளான் சமைக்க கடைக்கு சென்று காளான் வேண்டும் என ஒரு காகிதத்தில் எழுதிக் காட்டி இருக்கிறார். அதைப் படித்த அந்த கடை பணிபெண் இவரைப் பரிதாபமாகப் பார்த்திருக்கிறார். தனக்கு எந்தப் பிரச்சனையும் இல்லை என்றும் ஒரு காதலி கூட இருக்கிறார் என சொல்ல நினைத்தும் சொல்ல முடியலையேப்பாஆஆஆ என சிவாஜி பாணியில் மனதுக்குள் குலுங்கிக் குலுங்கிப் புலம்பி இருக்கிறார். எங்க உண்மைத்தமிழன் அண்ணன் இவ்வளவு நாள் பதிவெழுதாமல் இருக்கும் சாதனை விடவா அலெக்ஸ் கிர்க்கின் சாதனை பெரிது? போங்கய்யா போங்க.. :)

ராகுல்காந்தியின் அரசியல் பிரவேசம் நிர்பந்தத்தால் நிகழ்ந்ததாக இருப்பினும் அதை மிகச் சிறப்பாக செய்கிறார். நியமனங்கள், ஜால்றாக்கள், வயோதிகர்கள் போன்றவற்றால் புரயோடிக் கிடந்த கட்சி அமைப்புகளுக்கு புது ரத்தம் பாய்ச்சுகிறார். இளைஞர்களைத் தேடித்தேடி சந்திக்கிறார். அவர்களை அரசியலுக்கு அழைக்கிறார். மாணவர் மற்றும் இளைஞர் காங்கிரசுக்கு நியமன முறையை ஒழித்து தேர்தல் மூலம் பிரதிநிதிகளைத் தேர்ந்தெடுக்கப் போவதாக சொன்னதுடன் அதை நடைமுறைப் படுத்திக் கொண்டிருக்கிறார். தேர்ந்தெடுக்கப் பட்ட பிரதிநிதிகளுக்கு தன்னார்வ அமைப்புகள் மூலம் பயிற்சி அளிக்கப் படும் என அறிவித்தார் ராகுல்காந்தி. இப்போது பாண்டிச்சேரியில் பயிற்சிகள் நடைபெற்றுக் கொண்டிருக்கின்றன. நம் பதிவர் ஒருவரும் பங்கெடுத்துக் கொண்டிருக்கும் தன்னார்வ அமைப்பு ஒன்றும் இந்தப் பயிற்சிக்குத் தேர்ந்தெடுக்கப் பட்டு, அவரும் பாண்டிச்சேரியில் இப்போது பயிற்சி வகுப்பில் இருக்கிறார். இந்திய அரசியலில் பயிற்சி பெற்ற, ஆக்கப் பூர்வமாக சிந்திக்கும் இளைஞர்களின் ஆதிக்கம் வெகு விரைவில் நடக்கும். இதற்காக ராகுல்காந்திக்கு நன்றிகளும் பாராட்டுகளும்.

சமீபமாக வந்த திரைப் பாடல்களில் சில பாடல்களில் என்னை அதிகம் கவர்ந்திருக்கின்றன. அதில் முதல் இடம் ஓடிபோலாமா என்ற படத்தில் டி.இமான் இசையில் இடம் பெற்றிருக்கும் வாலுபையனே பாடல். அனிதாவின் குரலும் வரிகளும் அசத்தல். அடுத்து, ஆயிரத்தில் ஒருவனின் “உன் மேல ஆச தான்” பாடல். தனுஷின் தெனாவெட்டு குரலும் ஆண்ட்ரியாவின் மயக்கும் குரலும் கலக்கல். முந்தினம் பார்த்தேன் படத்தின் பேசும் பூவே பாடலின் இடையில் வரும் வரிகள் ரொம்ப நல்லா இருக்குங்க.. கேட்டுப் பாருங்க.. அப்டியே பையாவில் நா.முத்துக்குமாரின் வரிகளின் துளித்துளி மழையாய்.. அழகாய் மனதைப் பறித்துவிட்டாயே.. :).